दक्षिणकाली नगरपालिकामा सञ्चालन भएको “दोस्रो शहीद मानबहादुर स्मृति कप २०८२” को रोमाञ्चक फाइनल खेलमा वडा नं. ९ ले वडा नं. ५ लाई ५–४ गोल अन्तरले पराजित गर्दै उपाधि जित्न सफल भएको छ। त्रिभुवन आदर्श मा.वि.को खेल मैदानमा सम्पन्न फाइनल खेल दर्शकको उत्साहजनक उपस्थितिका बीच अत्यन्त प्रतिस्पर्धात्मक र रोमाञ्चक बनेको थियो।
खेलको सुरुवातदेखि नै दुवै टोलीले आक्रामक प्रदर्शन गरेका थिए। पहिलो हाफमा दुवै टोलीले बराबरी १-१ गोल गर्दै खेललाई सन्तुलित बनाएका थिएभने दोस्रो हाफमा कुनै गोल नहुदा पेनाल्टी प्रहारमा खेल गएको थियोे । पेनाल्टी प्रहारमा वडा नं ९ को ४ तथा वडा नं ५ को ३ गोल भएको थियो ।
फाइनल खेलमा सेलिब्रेटी अतिथिको रूपमा महिला राष्ट्रिय फुटबल टोलीकी खेलाडी निशा थोकरको उपस्थिति रहेको थियो। समापन समारोहमा विजेता वडा नं. ९ र उपविजेता वडा नं. ५ लाई पुरस्कार वितरण गर्नुका साथै उत्कृष्ट खेलाडी, उत्कृष्ट गोलकर्ता र अनुशासित टोलीलाई समेत सम्मान गरिएको थियो भने फाइनल खेलको म्यान अफ दि म्याच वडा नं ९ का विजय श्रेष्ठ भएका थिए ।
टुर्नामेन्टका अन्य उत्कृष्ट विधागत उपाधिहरू यसप्रकार रहेका छन्:
- बेस्ट प्लेयर अफ द टुर्नामेन्ट: राजन बल (वडा नं. ५)
- हाई स्कोरर: यमन महर्जन (वडा नं. ५)
- बेस्ट गोलकिपर: हरिशंकर तामाङ(वडा नं. ९)
- बेस्ट डिफेन्डर: सुवास पाख्रिन लामा(वडा नं. ५)
- इमर्जिङ प्लेयर: आर्यन थापा(वडा नं. १)
- बेस्ट टिम: वडा नं. ७
- बेस्ट कोच: सुरेन्द्र तामाङ (वडा नं. ९)
शहीद मानबहादुर स्मृति प्रतिष्ठानको आयोजनामा तथा दक्षिणकाली नगरपालिकाको आर्थिक सहयोगमा आयोजित यस प्रतियोगिताले खेलकुदमार्फत शहीदप्रति सम्मान प्रकट गर्नुका साथै युवाहरूमा अनुशासन, एकता र सकारात्मक ऊर्जा प्रवाह गर्न महत्वपूर्ण भूमिका खेलेको आयोजकले जनाएको छ।
नगरवासी, खेलप्रेमी र युवायुवतीहरूको उल्लेख्य उपस्थितिले प्रतियोगितालाई थप भव्य र सफल बनाएको थियो। आयोजकले प्रतियोगिताको सफलतामा सहयोग गर्ने सम्पूर्ण सरोकारवालाप्रति आभार व्यक्त गरेको छ।
